Investigimi/ Si mafia ballkanike, përfshirë grupet shqiptare, po dominon “Highway 10” të kokainës drejt Europës

Një investigim i thelluar i gazetës franceze Le Monde zbulon se si mafia ballkanike përfshirë edhe grupe kriminale shqiptare ka luajtur një rol të rëndësishëm në forcimin dhe zgjerimin e një prej korridoreve më të rëndësishme të trafikut ndërkombëtar të kokainës, të njohur si “Highway 10”.

Rruga detare që po ndryshon hartën e narkotrafikut

“Highway 10” është nofka që i është dhënë një rruge detare që ndjek paralelin e 10-të përmes Oqeanit Atlantik. Ajo lidh Amerikën e Jugut  ku prodhohet kokaina me brigjet e Afrikës Perëndimore. Nga atje, droga trafikohet drejt tregjeve europiane.

Sipas investigimit, që nga fundi i viteve 2010, trafikantët kanë shtuar ndjeshëm praninë e tyre në këtë itinerar, duke e konsideruar atë më pak të monitoruar nga autoritetet ndërkombëtare. Aktualisht, rreth një e treta e kokainës që hyn në Europë mendohet se kalon përmes kësaj rruge afrikane.

Ekspertët paralajmërojnë se, nëse kjo prirje vazhdon dhe mekanizmat e kontrollit nuk forcohen, korridori afrikan mund të shndërrohet në rrugën kryesore të narkotrafikut drejt Europës në një afat të shkurtër.

Sipas dokumenteve gjyqësore dhe komunikimeve të siguruara nga hetimet franceze, rrjetet kriminale nga Ballkani kanë qenë ndër aktorët më aktivë në këtë zhvendosje strategjike të trafikut. Mes tyre përmendet veçanërisht klani malazez i Kavaçit, i cili ka ndërtuar lidhje të forta me prodhues dhe ndërmjetës në Amerikën Latine, si dhe me bashkëpunëtorë në Afrikën Perëndimore.

Investigimi i Le Monde thekson se këto rrjete bashkëpunojnë ngushtë me grupe të tjera ballkanike, përfshirë elementë shqiptarë, duke krijuar struktura fleksibël që operojnë në disa kontinente njëkohësisht. Ata përdorin kompani guaskë, kontejnerë tregtarë dhe rrjete logjistike ndërkombëtare për të fshehur ngarkesat e drogës mes mallrave të ligjshme.

Një pjesë kyçe e hetimit bazohet në komunikime mes anëtarëve të rrjeteve kriminale ballkanike në një aplikacion të koduar, i cili u deshifrua nga policia franceze në vitin 2021. Këto mesazhe hedhin dritë mbi mënyrën se si organizoheshin dërgesat, si korruptoheshin zyrtarë lokalë dhe si shfrytëzoheshin dobësitë e tregtisë ndërkombëtare.

Dokumentet tregojnë se Afrika Perëndimore është shndërruar në një platformë strategjike tranziti, ku droga ruhet përkohësisht, ndahet në ngarkesa më të vogla dhe më pas ridërgohet drejt porteve europiane.

Sipas analizës së publikuar nga Le Monde, ndikimi i mafias ballkanike – përfshirë rrjete shqiptare – në këtë korridor të ri të trafikut tregon aftësinë e tyre për t’u përshtatur me presionin e autoriteteve dhe për të zhvendosur operacionet në zona më pak të kontrolluara.

Nëse nuk ndërmerren masa më të forta koordinimi mes vendeve të Amerikës Latine, Afrikës dhe Europës, “Highway 10” rrezikon të konsolidohet si arteria kryesore e furnizimit me kokainë për tregun europian, duke forcuar më tej fuqinë dhe ndikimin e organizatave kriminale ballkanike në skenën globale të narkotrafikut.