Ish-ministri shpjegon procedurën si Kosova mund të bëhet anëtare e KiE

Ish-ministri i Jashtëm, Enver Hoxhaj shprehet i bindur se Kosova do të bëhet pjesë e Këshilli të Evropës edhe pse parashikon që procesi të zgjasë në kohë.

Deputeti i PDK-së tha se KiE pasi do të marrë në shqyrtim aplikimin pritet që të dërgojë një delegacion në Prishtinë për të parë gjendjen e sundimit të ligjit, zbatimin e të drejtave të njeriut dhe demokracinë dhe pas këtij procesi vendos për aplikimin.

“Aplikimi i Kosovës në KiE është një proces i domosdoshëm me që është organizata më e vjetër në Evropë dhe Kosova është shteti më i ri. Kosova është i vetmi shtet në Evropë që nuk është shtet anëtar”, tha Hoxhaj.

Fakti që Rusia nuk është më pjesë e KiE, ish-ministri i Jashtëm thotë se është koha më e përshtatshme për një hap të tillë.

“Aplikimi i Kosovës ka qenë i pamundur për faktin se Rusia ka qenë shtet anëtar. Jo vetëm kaq, por edhe disa shtete lindore ndiqnin politikë proruse”, shtoi ai.

Në mbledhjen e fundit të KiE, aplikimi i Kosovës nuk është përfshirë në axhendën e punimeve deri në maj 2023.

Aplikimi i Kosovës duhet të marrë 2/3 e votave në Asamblenë Parlamentare të Këshillit të Evropës.

KiE ka në përbërje 46 vende anëtare, kurse Asambleja përbëhet nga 306 anëtarë që zgjidhen nga përfaqësues të parlamenteve të këtyre vendeve.

LEXONI GJITHASHTU:

• Gërvalla dorëzon aplikimin për anëtarësimin e Kosovës në Këshillin e Evropës
• Ambasadori gjerman shpreh mbështetjen për anëtarësimin e Kosovës në KiE