Jashari ngul këmbë për kalimin te Milani, Club Brugge nuk pranon uljen e çmimit

Ardon Jashari mbetet një ndër futbollistët më të përfolur në këtë merkato verore, kjo për faktin se skuadra e tij, Club Brugge, nuk po e lejon të largohet drejt destinacionit të ëndrrave, San Siro.

Prej javësh palët vijojnë diskutimet, por nuk ka asnjë rezultat, ndërsa do të zhvillohet një tjetër takim mes lojtarit shqiptar dhe drejtuesve të ekipit belg.

Mesfushori pritet t’i bëjë edhe më të qarta kërkesat e tij, ku do të kërkojë me patjetër largimin drejt Milanos, edhe pse kushtet e kërkuara nga Club Brugge nuk janë plotësuar.

23-vjeçari thuhet se ka arritur akordin për një kontratë afatgjatë me “djallin”, por pengesa e vetme është vlera 2 milionë euro, të cilën kuqezinjtë nuk kanë ndërmend ta paguajnë, duke e lënë ofertën në 38 milionë euro në total, nga 40 që kërkohen.

Pas kthimit nga Kumanova, futbollisti ka njoftuar drejtuesit për një takim, ku do të jetë së bashku me përfaqësuesit e tij për të gjetur gjuhën e përbashkët.

Milani po qëndron në prapavijë përgjatë këtyre ditëve, pasi e tha fjalën e fundit: nuk do të paguajë asnjë qindarkë më shumë nga oferta e bërë.

Pra, Brugge duhet patjetër të pranojë vlerën 38 milionë euro ose Jashari do të mbetet jashtë skuadrës, pasi lojtari ka marrë vendimin të mos kthehet më në stërvitje.

LEXONI GJITHASHTU:

• Jasir Asani firmos me Esteghlal, kur do të largohet nga Korea e Jugut për në Iran
• Parker flet për Armando Brojën: Jemi në bisedime, por ende nuk ka asgjë konkrete