“Jo non grata në zgjedhje”, Yuri Kim apel për pastërtinë e kandidatëve

Personat e shpallur non grata nuk duhet të marrin pjesë në zgjedhje. Kështu deklaroi ambasadorja e SHBA në Shqipëri, Yuri Kim gjatë një interviste për Zërin e Amerikës, ku theksoi se ata që janë sanksionuar për korrupsion nuk mund të pretendojnë se do të luftojnë korrupsionin.

“Në mendimin objektiv dhe të mirë menduar të Shteteve të Bashkuara të Amerikës, personat të cilët janë të përcaktuar, nuk duhet të jenë përfaqësues të popullit shqiptar. Populli shqiptar meriton më mirë dhe kërkon më mirë. Me këtë ka të bëjë demokracia, me këtë ka të bëjë edhe reforma në drejtësi. Dhe mendoj se kur ke njerëz të përcaktuar nga Shtetet e Bashkuara të Amerikës për korrupsion domethënës, kur këta individë pretendojnë që do të largojnë korrupsionin, është njësoj si zjarrvënësi i fshatit që premton se do shuajë të gjitha zjarret,” – deklaroi Kim.

Ambasadorja amerikane theksoi se është përgjegjësia e qeverisë për t’iu përgjigjur shqetësimeve që janë shprehur nga ODIHR-i në lidhje me zgjedhjet e kaluara siç janë blerja e votës dhe financimi i partive.

“Pamë në raportin e ODIHR-it për zgjedhjet e prillit 2021 që u vunë re mangësi, të cilat përfshijnë blerjen e votes. Përfshijnë abuzimin dhe keqpërdorimin e fondeve shtetërore, gjë që flet për politizimin e disa elementeve dhe aktiviteteve të administrimit. Presim që qeveria shqiptare dhe ata që janë përgjegjës, aktorët përgjegjës, përfshi Komisionin Qendror të Zgjedhjeve dhe udhëheqësit politikë, do të marrin masa,” – u shpreh ambasadorja amerikane.

Pritshmëritë e Uashingtonit, tha ambasadorja Kim, janë që Shqipëria do të bëjë më të mirën që të sigurojë që zgjedhjet të zhvillohen në përputhje me standardet dhe normat ndërkombëtare.

LEXONI GJITHASHTU:

• 22 mijë shqiptarë kanë marrë vizë 10-vjeçare drejt SHBA-ve, mesazhi i Yuri Kim
• Spahiu zbulon prapaskenat: Çfarë i kërkoi në tavolinë Yuri Kim-Damian Gjiknurit