‘Justifikimi se na duhen hotele masive, vetëm për betonizim të plazheve’ thotë aktivisti

Aktivisti mjedisor Ened Mato është i mendimit se turizmit shqiptar i mungon qëndrueshmëria. Ai shprehet kritik ndaj projekteve të mëdha hoteliere duke marrë si shembullin më të gabuar betonizimin e bregdetit të Durrësit.

“Po të shohim turizmin e Durrësit se si është shkatërruar gjithë bregdeti, duke hequr pyjet duke bërë beton të lartë tregon se është shkatërruar peizazhi për të akomoduar disa njerëz, tani Durrësi e mbajti këtë, por Dhërmiu, Jala, Qeparoi dhe plazhe të tjera gjysmë-ekzotike, të vogla, nuk mbajnë fare as hoteleri, as shkatërrime të kësaj natyre si në Durrës, që vazhdon deri 3 kilometra më tej,” – u shpreh Mato.

“Justifikimi se na duhen hoteleri masive në plazhet e Rivierës është për betonizimin e atyre plazheve,” – këmbënguli Mato duke shtuar se do shkatërrohet peizazhi.

Mato iu referua më pas gjetjeve të Barometrit sipas së cilave mesatarisht shqiptarët shpenzojnë rreth 2,500 lekë në ditë për pushime. Thënë këtë ai këmbënguli se në Rivierë ku dhomat e hoteleve shkojnë deri në qindra euro nata, ndërtimi i tyre nuk është për shqiptarët dhe turizmi masiv mund të dëmtojë natyrën.

“Pse u dashkan 100 hotele në Dhërmi me nga 300 euro nata, pse u dashka në Jalë 6 resorte siç duan të bëjnë, me 200-300 euro nata ku 400 metra është gjithë plazhi, ku do të shkojnë gjithë këta njerëz që do të vijnë, ky është shkatërrim i natyrës, […] ato plazhe nga ana ekologjike nuk i mbajnë këto masa njerëzish,” – tha Mato.

Aktivisti theksoi se pas shkatërrimit të natyrës në Rivierë do të mbeten vetëm godinat e betonit si në Durrës.

Deklarata e tij nxiti debate në emisionin “Barometri”, ku opinion ndryshe kishte Arben Çipa, sipërmarrës, njëherësh drejtues i një shoqate me operatorë turistikë.

LEXONI GJITHASHTU:

• ‘Turizmi shqiptar ka nevojë ulëritëse për hotele,’ thotë ish-ministri Klosi
• Çfarë i shqetëson dhe çfarë u pëlqen shqiptarëve gjatë pushimeve verore brenda vendit
• 50% e shqiptarëve nuk bënë pushime verore këtë vit