Juventusi fiton me 3 gola, diferenca me Interin sërish 2 pikë

Gara në kampionatin italian mes Interit dhe Juventusit duket se do të vijojë të jetë e fortë përgjatë këtij sezonit. Asnjëra prej skuadrave nuk po lëshon terren, me zikaltrit të cilët janë në krye me 51 pikë. Ndjekësi më i afërt është klubi torinez e më pas vjen Milani. Bardhezinjtë morën një tjetër fitore në kampionat, duke vijuar serinë e ndeshjeve me rezultat pozitiv.

Kundërshtari i së martës ishte Sassuolo, skuadër e cila në fazën e parë e surprizoi Juventusin duke i shënuar plot 4 herë. Këtë radhë llogaritë u bënë ndryshe me bardhezinjtë që nuk e toleruan për asnjë cast kundërshtarin, duke mos i dhënë asnjë mundësi. Vlahoviç me dy supergola në pjesën e parë dërgoi shifrat në 2-0.

Fraksioni i dytë tregoi sërish vendësit kërkues dhe madje duke gjetur dhe një herë rrugën e rrejtës, këtë herë me Chiesan, i cili hyri në lojë si zëvendësues. Italiani zuri vendin e turkut Yildiz, por arriti të lërë gjurmë. Sassuolo ishte skuadra e fundit që i kishte shkaktuar Juventusit humbje në kampionat, e që prej atij momenti numëron 12 fitore dhe 3 barazime. Edhe në kupë ecuria ishte pozitive, kun ë dy sfida torinezët shënuan plot 10 gola ndaj Frosinones dhe Salernitanës.