Ka qytetarë që nuk dihet si e kanë marrë patentën, thotë Gonxhja

Blendi Gonxhja, drejtor i Drejtorisë së Përgjithshme të Shërbimeve të Transportit Rrugor, DPRRTSH, thotë se qëllimi i shtrëngimit të kushteve për marrjen e patentës bëhet për të shmangur rastet abuzive të njerëzve të papërgjegjshëm.

Në emisionin “Goodmorning Albanians” në Euronews Albania, Gonxhja u shpreh se situata nuk është e rastësishme, pasi është e ditur se shumë njerëz në të shkuarën e kanë marrë patentën me lekë, madje ka nga ata që nuk e dinë si e kanë marrë patentën.

“Me ndryshimet në kodin rrugor e pamë të nevojshme të bënin një shtrëngim edhe më të madh, që të shkundte përfundimisht ata që bëjnë shkelje të përsëritura agresive; që e tejkalojnë gabimin njerëzor; që bëjnë skena në semafor apo vijat e bardha duke rrezikuar jetën e të tjerëve. Kemi shtrënguar masat, sepse nuk duam që në këtë pikë të mos ketë më asnjë lloj shtegu. Kjo situatë nuk është rastësishme në një vend kur edhe diplomat e shkollës janë dhënë për dreka-darka, nuk diskutohet që edhe patentat janë dhënë gjithashtu. Këta janë njerëz që nuk e dinë si e kanë marrë patentën, që nuk kanë lexuar kurrë asnjë libër”, tha Gonxhja.

LEXONI GJITHASHTU:

• Blendi Gonxhja: 50 % e atyre që bëjnë aksidente janë pa patentë
• Blendi Gonxhja tregon se çfarë ndodhë nëse shoferët humbin pikët e patentës