Kamberi: Marrëdhëniet shqiptaro-serbe, varen nga përfundimi i dialogut Kosovë-Serbi

Deputeti shqiptar në Kuvendin e Serbisë, Shaip Kamberi thotë se marrëdhëniet shqiptaro-serbe, varen nga çështja e dialogut mes Prishtinës dhe Beogradit.

Në një intervistë për emisionin “Balkan Talks” në Euronews Albania, Kamberi u shpreh se presidenti serb, Aleksandër Vuçiç dhe vetë Serbia, mund t’ë ndërtojë raporte të mira me të gjithë shqiptarët, e jo me një pjesë të tyre.

“Stabiliteti i përgjithshëm në Ballkanin Perëndimor do të varet nga çështja sesi do të përfundojë marrëveshja Kosovë-Serbi dhe sesi do të zgjidhet çështja e tensionuar në Bosnje. Aspiratat serbe, përmes projektit ‘bota serbe’, për Bosnjen, Kosovën dhe Malin e Zi janë reale. Mund të keni raporte të mira ekonomike me një shtet, por nëse Serbia do kishte futur trupat e veta në veriun e Kosovës, në ato ditë kur ishte ultimatumi për të hequr targat, cili do ishte reagimi i Shqipërisë?

Raportet e mira, Aleksandër Vuçiç dhe Serbia mund t’i ndërtojë me të gjithë shqiptarët bashkarisht, jo me një pjesë të tyre, duke pasur raporte armiqësore me pjesën tjetër. Esenciale për stabilitetin e Ballkanit, është çështja sesi do të zgjidhen raportet Kosovë-Serbi dhe në bazë të kësaj, sesi do jetë trajtimi tjetër i Serbisë, ndaj shqiptarëve të Luginës së Preshevës”, theksoi ai.

LEXONI GJITHASHTU

• Milaim Zeka: Shkëmbimi i territoreve, e vetmja zgjidhje për Kosovën
• Ekskluzive| I dërguari i Gjermanisë: Nuk do pranojmë një republika Srpska në Kosovë
• Kosova vendos regjim vizash për shtetasit rusë