Katër të plagosur nga shpërthimi i bombolës në Maliq – Dëshmia e kryefamiljarit

Një bombol gazi ka shpërthyer këtë mëngjes në një banesë në fshatin Maliq, duke shkaktuar plagosjen e katër personave, mes tyre një fëmijë 8-vjeçar.

Të plagosurit e tjerë, të moshës 26-32 vjeç, janë dërguar në Spitalin Rajonal të Korçës, ku po marrin trajtim të specializuar.

Sipas raportimeve, ata kanë pësuar djegie kryesisht në pjesën e fytyrës.

Kryefamiljari i banesës, Jetnor Muçollari, ka treguar për Euronews Albania se shpërthimi ndodhi në momentin e ndërrimit të kokës së bombolës së gazit.

Sipas tij, në dhomë ndodheshin bashkëshortja, nusja e djalit dhe fëmija 8-vjeçar, ndërsa ai vetë ishte në ballkon kur ndodhi shpërthimi.

“Shpërtheu një bombol gazi. Blemë një kokë të re për bombolën, hoqëm të vjetrën për të vendosur të renë dhe në atë moment ndodhi shpërthimi. Brenda në dhomë ishin djali, gruaja ime, nusja e djalit dhe një fëmijë 8-vjeçar. Unë ndodhesha në ballkon kur dëgjova shpërthimin. Ambulanca i mori të plagosurit. Bombola ishte brenda në dhomë, sapo e kishim blerë një të re për ta rregulluar, por papritur shpërtheu.” – ka deklaruar Muçollari.

Ndërkohë, policia e Korçës ka apeluar qytetarët që përdorin bombula gazi për ngrohje të tregojnë kujdes maksimal në përdorimin e tyre, duke shmangur rrezikun e shpërthimeve.

Njoftimi zyrtar i Policisë:
Rreth orës 11:00, në fshatin Maliq, në banesën e shtetasit M. M., dyshohet se ka ndodhur një shpërthim i një bombole gazi. Si pasojë, janë lënduar katër persona, të cilët ndodhen jashtë rrezikut për jetën dhe po marrin trajtim mjekësor.

Grupi hetimor ndodhet në vendngjarje dhe po punon për zbardhjen e plotë të rrethanave të incidentit.

LEXONI GJITHASHTU:

• Aksident me vdekje në aksin Pogradec – Maliq, humb jetën këmbësori
• Informaliteti në punë mbetet i lartë, paga të ulëta dhe probleme me sigurimet