Kërcënimi i ISIS, blindohen stadiumet ku do të luhen ndeshjet e Champions League

Liga e Kampionëve është kryefjala e sportit botëror të martën dhe të mërkurën ku në fushë zbresin 8 skuadra. Reali i Madridit përballet me Manchester Cityn në Spanjë, ndërsa paralelisht në Emirates luhet Arsenal-Bayern. Të mërkurën Atletiko Madrid pret Dortmundin, ndërsa PSG Barcelonën. Kur duhen ende disa orë nga nisja e këtyre përballjeve një alarm ka shkaktuar shqetësim në rrjetet sociale, i cili lidhet me shtetin islamik të ISIS.

Këta të fundit nëpërmjet një reagimi në rrjetet e tyre sociale kanë publikuar një foto në të cilën bëhen thirrje për vrasje në 4 stadiumet ku do të luhen ndeshjet, konkretisht në Bernabeu, Emirates, Wanda Metropolitano dhe Parc De Princes. Thirrja është bërë mbrëmjen e së hënës ndërsa është shpërndarë me shpejtësi në rrjetet sociale, teksa reagimi ka qenë i madh.

Për të shmanguar çdo lloj ngjarje kriminale apo edhe terroriste, autoritet në këto shtete kanë shtuar masat e sigurisë, ndërsa një numër i madh efektivësh policie janë vendosur në terren, madje duke qarkulluar disa orë para ndeshjeve. Këto masa do ta shoqërojnë të gjithë kompeticionin, i cili ka një mesatare të lartë të tifozëve në stadium. Kjo nuk është hera e parë, pasi edhe në të shkuarën ka pasur kërcënime të tilla, si ai në finalen e Champions mes Realit të Madridit dhe Juventus.