Kërkesa e SHBA për njohjen e Kosovës, Baton Haxhiu: Joe Biden e fiton betejën

Kreu i Shtëpisë së Bardhë, Joe Biden i kërkoi presidentit serb Aleksandar Vuçiç të njohë pavarësinë e Kosovës. Në një letër dërguar me rastin e Ditës Kombëtare të Serbisë, Biden bëri thirrje për arritjen e një marrëveshjeje gjithëpërfshirëse për normalizimin e marrëdhënieve mes Beogradit dhe Prishtinës, bazuar tek njohja reciproke e dy vendeve.

Analistët Andi Bushati dhe Baton Haxhiu në emisionin “Shock” komentuan këtë hap të presidentit të 46-të të Amerikës, i cili kërkon me ngulm njohjen reciproke. Sipas z. Haxhiu brenda letrës së Joe Biden drejtuar shtetit të Serbisë tregon se rruga për të shkuar deri tek njohja është e largët.

Ai beson që SHBA nën drejtimin e Joe Biden do ta fitojë betejën karshi Serbisë, të cilën do ta “detyrojë” të njohë pavarësinë e Kosovës.

“Brenda kësaj letre dhe nga përgjigja e Vuçiçit shihet një gjë: deri tek njohja ka një mal dhe një det në mes. Ky kërkon njohje dhe brenda njohjes kërkon gjithëpërfshirjen e problemeve, të cilat janë në tavolinë. Gjithëpërfshirjen e problemeve e kanë vendosur Biden me Hillary Clinton në vitin 2014. Vuçiç e ka ngritur projeksioni politik se njohja nuk ka, por gjithçka përveç njohjes. Unë besoj se ai (Joe Biden) e fiton betejën ose nëse nuk e fiton betejën na lë në rënie të lirë që nuk e dimë se ku e kemi fundin”, tha ai.

Nga ana tjetër, analisti Andi Bushati thotë se përgjigjja e Vuçiç ndaj letrës tregon se Serbia ndodhet në një pozicion më pak të favorshëm seç ishte me administratën e Donald Trump.

“Unë mendoj se letra e Joe Biden ironikisht në Ditën e Festës Kombëtare të Serbisë dhe sidomos përgjigja që ktheu Vuçiç janë shumë sinjikative për të zbërthyer debatin që është bërë këtu tek ne. Sot shohim letrën e Biden, që i kërkon Serbisë një gjë dhe interpretimin që i bën Vuçiç, i cili thotë kemi një ndryshimi të politikës amerikane. Pra për Vuçiçin, sot Serbia ndodhet në një pozicion më të keq seç ishte nën presidencën Trump”, shtoi ai.