Këshilli i BE-së: Të finalizohet sa më shpejt liberalizimi i vizave të Kosovës

Këshilli Evropian ka theksuar edhe një herë se progresi i prekshëm në lidhje me çështjet e pazgjidhura ndërmjet Prishtinës dhe Beogradit duhet të arrihet sa më shpejt përmes dialogut.

Lidhur me këtë, analisti nga Kosova, Gazmir Raci thotë se Bashkimi Evropian tashmë e ka kushtëzuar liberalizimin e vizave me dialogun Kosovë-Serbi, pasi në konkluzionet e samitit u përmend vetëm dialogu si dhe rëndësia e progresit, raporton SchengenVisaInfo.com .

“Kushti i vetëm është dialogu, pasi kancelari gjerman Olaf Scholz tha në Beograd dhe Prishtinë se BE-ja nuk do të pranojë shtete që nuk janë njohur me njëri-tjetrin apo kanë probleme mes tyre. Duhet të zgjidhim problemet mes nesh, të marrim liberalizimin e vizave dhe më pas statusin e kandidatit”, ka theksuar Raci.

Ai u shpreh se kjo nuk është e drejtë pasi asnjëherë nuk kemi pasur dialogun si kusht për liberalizimin e vizave.

Sipas Racit, një argument tjetër që qarkullon në rrjetet sociale është se Kosova nuk po merr liberalizimin e vizave pasi ka popullatë shumicë myslimane. Mirëpo, një teori e tillë është mohuar nga Raçi, i cili tha:

“Edhe pse është folur edhe për këtë, unë nuk besoj në tezën se nuk liberalizohen vizat për Kosovën sepse është një vend me shumicë myslimane. Është një argument që nuk qëndron sepse edhe Bosnja dhe Hercegovina ka popullsi myslimane, por ka përfituar nga liberalizimi i vizave”, tha ai.

Procesi i liberalizimit të vizave për Kosovën ka filluar më 19 shkurt 2012 dhe një proces i tillë ende nuk është finalizuar, përkundër faktit se në vitin 2018 Komisioni Evropian dhe Parlamenti Evropian vlerësuan se Kosova i kishte përmbushur dy kërkesat e fundit për liberalizimin e vizave. Megjithatë, procesi ende nuk është finalizuar.

Raporti i fundit i siguruar nga Henley Passport Index zbuloi se pasaportat e Kosovës u lejojnë mbajtësve të saj të udhëtojnë pa viza në vetëm 41 shtete, që do të thotë se Kosova ka pasaportën më të dobët në Evropë.

Sa i përket vendeve evropiane, mbajtësit e pasaportës së Kosovës kanë të drejtë të udhëtojnë vetëm në Shqipëri, Serbi, Maqedoninë e Veriut, Mal të Zi dhe Turqi pa u kërkuar fillimisht vizë.

Ndër pengesat kryesore për procesin e liberalizimit të vizave për Kosovën mbetet kundërshtimi i Holandës dhe Francës, pasi qeveritë e të dyja vendeve kanë shprehur shqetësimet e tyre se finalizimi i këtij procesi mund të çojë në fluks të emigrantëve nga Kosova drejt vendeve të tjera.

LEXONI GJITHASHTU:

• Rishkrimi i kufijve me Kosovën nuk është zgjidhje, thotë Vuçiç