KFOR-i vendos tabela të reja në kufirin e Kosovës me Serbinë

KFOR-i në Kosovë bëri të ditur se po vendos tabela të reja në kufirin Kosovë-Serbi. Në një njoftim për media, misioni i NATO-s tha këtë veprim po e ndërmarrin për shkak të natyrës malore dhe pyjore të terrenit.

“Ushtarët e misionit KFOR të udhëhequr nga NATO-ja aktualisht po veprojnë përgjatë Vijës Kufitare Administrative, brenda zonës së përgjegjësisë së KFOR-it, për të instaluar tabela të reja. Për shkak të natyrës malore dhe pyjore të terrenit, këto tabela po vendosen për të shënuar qartë zonën e operacioneve të KFOR-it dhe do të ndihmojnë në uljen e rrezikut të kalimeve aksidentale. Vendosja e këtyre tabelave do të vazhdojë gjatë javëve të ardhshme”, ka thënë KFOR-i.

KFOR-i, gjithashtu, ka thënë se do të vazhdojë aktivitetet e tij bazuar në Rezolutën 1244 të Këshillit të Sigurimit të OKB-së të vitit 1999 për të kontribuar në një mjedis të sigurt për të gjithë njerëzit që jetojnë në Kosovë, duke përfshirë patrullimet në veri të Kosovës dhe në afërsi të kufirit./KosovaPress