Kinemaja më e vjetër aktive në Kosovë bëhet gati për restaurim

Kinemaja më e vjetër aktive në Kosovë, Kino Lumbardhi sivjet mbush 70 vite.

Pas tentativave për rrënim dhe privatizim, ajo u shpëtua me angazhimin e komunitetit kulturor nga Prizreni dhe Kosova, duke u shndërruar prej një objekti të dëmtuar dhe të pashfrytëzueshëm, në një nga monumentet më të vizituara të trashëgimisë kulturore në Kosovë.

I njohur paslufte si pika kryesore e DokuFest, që nga viti 2015 ajo është shndërruar në një qendër kulturore multi-funksionale që i shërben qytetarëve gjatë gjithë vitit.

Teksa pritet të hyjë në restaurim të plotë në vjeshtën e këtij viti me mbështetje të BE-së dhe Ministrisë së Kulturës në Kosovë, ajo tani feston programin e 70-vjetorit, ku do të prezantohen filma, botime, takime, ligjerata, festivale si dhe koncerte të shumta me artistë vendor dhe ndërkombëtar, në një sezon që përfundon me 1 tetor.

E para performancë ndërkombetare e kësaj serie është me artisten e njohur Kanadeze-Ruse Michelle Gurevich, e cila do të performojë për herë të parë në Kosovë më 24 qershor në ambientet e kinemasë verore.

LEXONI GJITHASHTU

• Nata e parë e Festivalit të Kanës, yjet e kinemasë parakalojnë në tapetin e kuq