Klodiana Shala zbulon takimet me yjet e futbollit: Messi më i afërt, Ronaldo i distancuar

E ftuar në emisionin “Review”, me Greta Topjanën, atletja Klodiana Shala ka folur për finalen e Botërorit dhe për figurat më të mëdha të futbollit botëror, duke u ndalur te Lionel Messi. Shala tha se e simpatizon yllin argjentinas jo vetëm për arritjet sportive, por mbi të gjitha për karakterin dhe mënyrën njerëzore të komunikimit.

Atletja tregoi se ka pasur mundësinë të takohet me disa prej emrave më të mëdhenj të sportit gjatë pjesëmarrjeve të saj në olimpiada, duke përmendur Messin, Ronaldinhon dhe Ronaldon.

“Unë Mesin e simpatizoj si njeri, si njerëzillik njëherë në radhë të parë. Pastaj vjen pjesa e sportistit, sepse kam pasur fatin që jemi përshëndetur, jemi takuar, jo vetëm me Mesin, por edhe me Ronaldinhon, në kohën e Brazilit të dikurshëm. Duke marrë pjesë nëpër olimpiada kam pasur fatin t’i takoj”, tha Shala.

Shala u shpreh se ajo që e bën një sportist të madh nuk është vetëm suksesi në fushë, por edhe sjellja dhe thjeshtësia në marrëdhënie me të tjerët.

“Si ishin ata në komunikim? Shumë njerëzorë. Kjo është kryesorja që duhet e para, sepse nuk të shikojnë si njeri për paratë apo famën. Ata janë njerëzorë, janë të thjeshtë, janë profesionistë, janë sportistë, janë baballarë, janë pjesë e shoqërisë, janë qytetarë”, tha ajo.

Duke folur për dallimet mes yjeve të futbollit, Shala tha se kjo lidhet edhe me karakterin personal të secilit sportist.

“Ronaldo ka qenë pak më i distancuar, por kjo varet edhe nga karakteri i tij. Messi ka qenë më i afërt”, tha Shala.