KLP mblidhet të hënën, në fokus lista e kandidatëve për drejtues të SPAK

Këshilli i Lartë i Prokurorisë do të zhvillojë mbledhjen e radhës plenare ditën e hënë, në orën 10:00. Mbledhja do të zgjasë 90 minuta dhe do të mbahet në sallën e mbledhjeve të institucionit.

Në fokus të mbledhjes është shqyrtimi dhe miratimi i projektvendimit për listën e kandidatëve që plotësojnë kushtet ligjore për pozicionin e Drejtuesit të Prokurorisë së Posaçme kundër Korrupsionit dhe Krimit të Organizuar, SPAK.

KLP do të shqyrtojë dhe projektvendimin për caktimin e prokurorit Leonard Filopati në gjykimin e një çështjeje pranë Gjykatës së Shkallës së Parë të Juridiksionit të Përgjithshëm në Dibër.

Në mbledhje pritet të marrin pjesë anëtarët e KLP-së, përfaqësues nga Prokuroria e Përgjithshme, Ministria e Drejtësisë, projekti EU4Justice dhe programi OPDAT. Sipas njoftimit dhe media është e ftuar të ndjekë zhvillimet.

Kandidatët e SPAK janë katër prokurorë, Adnan Xholi, Klodian Braho, Doloreza Musabelliu dhe Ervin Gokaj.

Agjenda është publikuar në faqen zyrtare të Këshillit të Lartë të Prokurorisë.

LEXONI GJITHASHTU:

• SPAK përfundon hetimet për ish-shefin e Rrugores, Roven Zeka
• Karamuço: Mund të ketë tërheqje të prokurorëve nga gara për kreun e SPAK