KLSH: Fëmijët në “Zyber Hallulli” të kequshqyer, nuk respektohen kuotat

Të miturit në “Shtëpinë e Fëmijës Zyber Hallulli” ushqehen më pak se norma, duke mos marrë sasinë dhe kaloritë e nevojshme.

Këto kanë qenë gjetjet e raportit të auditimit nga Kontrolli i Lartë i Shtetit në këtë institucion, i cili evidention mosrespektimin e standardeve për ushqyerjen e fëmijëve gjatë viteve 2019, 2020 dhe 2021.

Sipas raportit, kuota ditore në lekë që institucioni shpenzon për blerjen e ushqimeve, nuk i përgjigjet të njëjtës sasi ushqimore që duhet të konsumojnë fëmijët, për të jetuar shëndetshëm.

Kjo, pasi institucioni përkatës nuk respekton standardet e përcaktuara nga Ministria e Shëndetësisë për kuotën financiare që duhet të shpenzohet për fëmijët e grupmoshave të ndryshe.

Kontrolli i Lartë i Shtetit ka përllogaritur gjithashtu se sa duhet të jetë kuota ditore që duhet të shpenzohet për ushqyerjen e çdo fëmije sipas grupmoshës, duke reflektuar në kuotën ditore edhe indeksimin e çmimeve.

Për grupmoshën 6-12 vjeç, nga 440 lekë/ditë në vitin 2018, në fund të vitit 2021 duhej të bëhej në 487,35 lekë/ditë, pra do të ishte rritur me 47 lekë/ditë.

Për grupmoshën 13-15 vjeç, nga 480 lekë/ditë në vitin 2018, në fund të vitit 2021 duhej të bëhej në 531,66 lekë/ditë, pra do të ishte rritur me 52 lekë/ditë.

Për grupmoshën 16-18 vjeç, nga 500 lekë/ditë në vitin 2018, në fund të vitit 2021 duhej të bëhej në 553,81 lekë/ditë, pra do të ishte rritur me 54 lekë në ditë.

Lidhur me këto mangësi të evidentuara në trajtimin ushqimor të fëmijëve, KLSH kërkon nga shërbimi social dhe Ministria e Shëndetësisë të merren masa për nxjerrjen e përgjegjësive dhe plotësimin në vijim të të gjitha nevojave ushqimore për fëmijët sipas standardeve.

LEXONI GJITHASHTU:

• Bastisje në Mal të Zi për spiunim për shërbimet ruse
• Fermerët e Dvoranit kërkojnë treg, dëmtohen nga konkurrenca e pandershme
• Shpërdorim detyre e korrupsion, arrestohen 4 punonjësit e doganës në Korçë