Kolegji Zgjedhor merr vendimin, kush e merr mandatin e “Shqipëria Bëhet”

Kolegji Zgjedhor ka lënë në fuqi vendimin e KAS, duke i dhënë mandatin e vetëm të koalicionit “Nisma Shqipëria Bëhet” kandidates së parë në listën e mbyllur, Ana Dajko.

Ajo tashmë ka të drejtë të bëjë betimin në seancën e parë të Kuvendit, e cila pritet të zhvillohet në javën e dytë të shtatorit.

Kërkesa e Adriatik Lapajt, për të marrë mandatin e vetëm që ka fituar në zgjedhje koalicioni që ai drejtoi, “Nisma Shqipëria Bëhet”,  u rrëzua  nga Kolegji Zgjedhor.

Sipas marrëveshjes së arritur më herët mes dy partive që përbëjnë koalicionin, “Nisma Thurje” dhe “Shqipëria Bëhet”, kandidatët e listës së mbyllur kishin firmosur paraprakisht dorëheqje nga mandati, për të hapur rrugë kandidatëve të listës së hapur. Në këtë skenar, mandati do t’i kalonte Adriatik Lapajt si kandidati më i votuar.

Por situata u tensionua kur Zeqir Kordhoni, i afërmi i drejtuesit tjetër të koalicionit Endri Shabani, paraqiti kërkesë për të marrë mandatin. Sipas Shabanit dhe Kordhonit, kjo kërkesë bazohej në një deklaratë të mëhershme të Lapajt, i cili, sipas tyre, kishte premtuar se do të hiqte dorë nga mandati nëse koalicioni do të siguronte vetëm një vend në Kuvend.

Për shkak të mosmarrëveshjeve dhe pretendimeve të ngritura nga pala tjetër, Adriatik Lapaj aktivizoi emrin e simotrës së tij Kleana Xhuveli, e renditur e katërta, duke e parë atë si mundësi për të mos lejuar që mandati i vetëm i këtij koalicioni të kalonte te “Nisma Thurje”. Fillimisht KQZ ia dha mandatin Xhuvelit, por ankimimi i “Shqipëria Bëhet” në KAS, bëri që mandati t’i jepej, Ana Dajkos, kandidatese renditur e para në listën e mbyllur. I njëjti vendim u la në fuqi edhe nga Kolegji Zgjedhor.

LEXONI GJITHASHTU:

• “Mbi 8 mld dollarë ndihmë për Ukrainën”, kryeministri norvegjez njofton panin
• Netanyahu: Izraeli mund të tërhiqet nga Libani, nëse Hezbollahu çarmatoset