Komisioni Hetimor për Shëndetësinë, Vokshi kërkon rikthimin e deputetëve të opozitës

Këtë të premte u zhvillua mbledhja e Komisionit për Shëndetësinë, ku të pranishëm nga kampi i djathtë ishte vetëm kryetarja e Komisionit, Albana Vokshi dhe deputeti, Petrit Vasili.

Kjo për shkak se në ndryshim nga mbledhja e fundit, e zhvilluar dy ditë më parë, pjesa tjetër e deputetëve të opozitës që janë të përjashtuar nga jeta parlamentare, nuk ishin të pranishëm.

Për këtë, Vokshi ka kërkuar kthimin e deputetëve të opozitës në mbledhjet e komisionit përmes një shkrese dërguar kryetares së Kuvendit, Elisa Spiropali.

“I kemi dërguar Spiropalit shkresë, pasi kemi deleguar shkeljet e panumërta të deputetëve të këtij komisioni i kemi kërkuar zëvendësimin e nënkryetarit dhe të paralajmërojë 6 deputetët e tjerë. Komisioni hetimor funksionon me ligj të veçantë. Kërkojmë që 5 deputetët e përjashtuar me firmë të Bushkës të jenë këtu prezent deri në fund të komisionit,” -tha ajo.

Ajo ka kërkuar që këto mbledhje të vijojnë në ligjshmëri dhe kushtetueshmëri, nisur nga kërkesa për kthimin e deputetëve.

Sakaq Vokshi kërkoi ndërprerjen e mbledhjes së sotme dhe kërkoi që javën e ardhshme të vijohet me seancat e dëshmitarëve, për të cilën nëse nuk mjafton koha të zgjatet me 2 deri në 3 javë nga seancat plenare për Komisionin.