Komisioni i Rithemelimit takim me Bardhin dhe Alibeajn

Komisioni i Rithemelimit po zhvillon një takim me Sekretarin e Përgjithshëm Gazmend Bardhi dhe Kryetarin e Komanduar të PD-së Enkelejd Alibeaj në selinë e PD-së.

Ky takim vjen pas vendimit të Gjykatës për të njohur Kuvendin e 11 dhjetorit të thirrur nga Berisha dhe ndryshimet statutore të bëra gjatë tij.

Më përpara, përfaqësuesi ligjor i Komisionit të Rithemelimit, Ivi Kaso njoftoi se ky Komision do të zhvillonte një mbledhje.

Deklaratën e Kryetarit të Komanduar të PD-së, Enkelejd Alibeaj, për të ankimuar vendimin e Gjykatës, Kaso e cilësoi si tentativë për të krijuar përshtypjen te publiku që ka ende debate e problematika brenda PD-së.

“Kjo ndodh në kohën që vendimi i sotëm ka zgjidhur në mënyrë përfundimtare problemin ende të hapur të legjitimitetit të organeve drejtuese të PD-së”, u shpreh Kaso.

Gjykata e Tiranës mori vendimin të premten për të njohur Kuvendin e 11 dhjetorit, dhe miratoi ndryshimet në statutin e PD-së e simboleve që janë marrë gjatë këtij Kuvendi.