Kongresmeni Lawler letër Kurtit: Mbështetja e SHBA për Kosovën mbetet e fortë

Kongresmeni republikan, Mike Lawler i ka dërguar një letër kryeministrit të Kosovës, Albin Kurti. Në letër, Lawler shprehet se mbështetja e Shteteve të Bashkuara për Kosovën mbetet e fortë dhe dypartiake.

Sipas tij veprimet e fundit legjislative, duke përfshirë miratimin e Ligjit për Autorizimin e Mbrojtjes Kombëtare për vitin fiskal 2026, nënvizojnë përkushtimin e vazhdueshëm të Amerikës ndaj së ardhmes euro-atlantike të Kosovës.

Përpjekjet e tilla, thuhet tutje në letër, janë të domosdoshme për promovimin e stabilitetit afatgjatë, sigurisë dhe sundimit të ligjit në mbarë Ballkanin Perëndimor. Kurti në postimin e tij ku ndau letrën e Lawler u shpreh se partneritet mes dy vendeve është strategjike.

“Në administratën e demokratëve e fituam lirinë. Në administratën e republikanëve e shpallëm pavarësinë. Me administratën e fundit të demokratëve morëm grantin më të madh në historinë e vendit, 202 milionë dollarë investim në energji. Me administratën e tanishme republikane po e forcojmë si asnjëherë më parë ushtrinë dhe mbrojtjen me armatim dhe sisteme amerikane. Partneriteti ynë është strategjik, aleanca jonë është vlerore, miqësia historike, andaj edhe mbështetja për shtetin tonë në Kongresin e Shteteve të Bashkuara të Amerikës është dypartiake. Falënderoj kongresistët Mike Lawler (R) dhe George Latimer (D) për letrat uruese dhe për angazhimin e vazhdueshëm që kanë në forcimin e raporteve ndërmjet dy shteteve tona”, shkruan Kurti.