Korrupsioni në PE, Romano Prodi: Vuajtje për Evropën, gjithçka të bëhet transparente

Ish-presidenti i Komisionit Europian dhe ish-kryeministri i Italisë, Romano Prodi ka komentuar për Euronews Albania zhvillimet më të fundit në Parlamentin Europian, ku ish-zv.kryetarja e këtij institucioni dhe disa eurodeputetë të tjerë janë vënë nën akuzën e korrupsionit.

Në një intervistë ekskluzive, Prodi u shpreh se gjithçka në lidhje me këtë çështje duhet të bëhet transparente, pasi në të kundërt, si mund të besojnë në BE, vende si Shqipëria, që aderojnë për anëtarësimin në union.

“Më ngjall shumë trishtim. Nuk i kam shumë informacionet e fundit, pasi kam pothuajse 20 vite që jam shkëputur, por është vuajtje për Evropën. Shpresoj që gjithçka të bëhet transparente dhe të dalë në dritë, pasi përndryshe si do të besojë Shqipëria te Bashkimi Evropian?”, theksoi ai.

Sipas tij, ka nevojë për reagim për këtë çështje, pasi një rrezik që i kanoset gjithmonë demokracisë, është korrupsioni.

“Do të thotë se tashmë ka nevojë për reagim për këto çështje. Nëse reagohet siç reagohet në demokraci, ky rast mund të bëhet një dhe element bashkimi. Sepse, shikoni një rrezik që i kanoset gjithmonë demokracisë është pikërisht korrupsioni. Është një problem botëror dhe risk për çdo demokraci në botë”, tha Prodi.

LEXONI GJITHASHTU

• Pas Eva Kaili, edhe 4 euro-deputetë pezullohen nga postet
• Skandali i korrupsionit në PE, Von der Leyen: Alarmante, duhen ligje më të forta
• ‘Legjislacion kundër korrupsionit’, euro-deputetët reagojnë pas skandalit të Katarit