Kosova dhe SHBA marrëveshje për mbrojtjen e informacionit sekret

Qeveria e Kosovës dhe qeveria e Shteteve të Bashkuara të Amerikës kanë nënshkruar një marrëveshje mbi masat e sigurisë me qëllim mbrojtjen e informacionit të klasifikuar.

Marrëveshja u firmos nga kryeministri Albin Kurti dhe ambasadori i Shteteve të Bashkuara të Amerikës, Jeffrey Hovenier në emër të dy qeverive respektive.

Kurti e cilësoi atë si tejet të rëndësishme në kuadër të bashkëpunimit në fushën e sigurisë, të mbrojtjes mbi informacionin e klasifikuar. Ai e falënderoi ambasadorin amerikan, Hovenier dhe Departamentin e Mbrojtjes të ShBA-së si implementuesin e Marrëveshjes, për besimin e treguar dhe për fuqizimin e mëtejmë të lidhjeve tona shtetërore përmes dakordimeve të këtilla.

Arritje të rëndësishme në marrëdhëniet ndërmjet ShBA-së dhe Kosovës e vlerësoi edhe Hovenier. Ai tha se ajo përfaqëson zotimin e fuqishëm të tyre për vazhdimin e bashkëpunimit në fushën e sigurisë dhe se në të njëjtën kohë çon përpara aftësinë e Kosovës për të mbrojtur sovranitetin dhe integritetin territorial përmes shkëmbimit të informatave me SHBA-në.

Me marrëveshjen e nënshkruar sot dy shtetet marrin detyrime për mbrojtën e informatave të klasifikuara të njëra tjetrës, duke hapur derën për shkëmbim të këtyre informatave.

LEXONI GJITHASHTU:

• Zjarr në klinikën e psikiatrisë në Kosovë, vdes 1 pacient, 5 persona të lënduar
• EMRI| Tentoi të trafikonte armë drejt Francës, kapet në Durrës i riu nga Kosova