Kosova drejt Botërorit, Kurti premton shpërblime rekord për futbollistët

Kryeministri në detyrë i Kosovës, Albin Kurti, ka njoftuar në mbledhjen e radhës së Qeverisë shpërblimet që do t’u jepen futbollistëve të përfaqësueses për arritjet e tyre në kualifikimet për Kupën e Botës 2026.

Kurti bëri të ditur se për suksesin historik të skuadrës në këtë fushatë, kalimin në fazën e playoff-it, Qeveria do të ndajë 250 mijë euro shpërblim. Ai shtoi se në rast të fitores ndaj Sllovakisë futbollistët do të marrin 500 mijë euro shtesë, ndërsa për kualifikimin në Botëror, do të ketë një shpërblim shtesë prej një milion eurosh.

Kryeministri theksoi se këto vendime janë shprehje e besimit të qeverisë në ekipin kombëtar dhe dëshirës për ta motivuar drejt arritjeve të mëtejshme.

“Një lajm të mirë e kemi për përfaqësuesen tonë në futboll, për djemtë me të cilët jemi krenar në çdo ndeshje. Për suksesin historik në këtë fushatë të kualifikimeve për në Kupën e Botës 2026, kalimi në fazën e playoff-it, me vendim të qeverisë, sot do të ndajmë 250 mijë euro shpërblim. Në fazën e radhës hyjmë me plot vetëbesim, besimin tonë në ta po e shprehim me zotimet tona për ta. Së pari, në rast të fitores ndaj Sllovakisë zotohemi me shpërblim me vlerë prej 500 mijë euro dhe së dyti, në rast të kualifikimit në Kupën e Botës zotohemi edhe për një milion euro të tjera shpërblim”, theksoi Kurti.

Ndaj Sllovakisë, Kosova ndeshjen do ta zhvillojë në muajin mars.

LEXONI GJITHASHTU:

• Lëvizja Vetëvendosje nominon Albin Kurtin kandidat për kryeministër të Kosovës
• BE: Serbia po shkel obligimet duke kundërshtuar anëtarësimin e Kosovës në Interpol