“Kosova luan për 3 pikët ndaj Zvicrës”, Foda: Do të luftojmë

Pasi siguroi Play-Off pak ditë më parë, Kosova është e qetë dhe do të përballet mbrëmjen e së martës, në orën 20:45, me Zvicrën në shtëpi.

Dardanëve u duhet një fitore me rezultat të thellë për të marrë kreun e grupit, gjë që sipas trajnerit Franco Foda ka pak shanse të ndodhë, megjithatë ekipi synon të marrë 3 pikët.

“U kam thënë lojtarëve se gjëja më e rëndësishme është të luajmë mirë. Në Zvicër nuk e kemi treguar fytyrën tonë të vërtetë dhe për këtë arsye do të bëjmë gjithçka për të fituar në shtëpi. Në teori shumë gjëra janë të mundshme, por në realitet Zvicra ka luajtur në mënyrë konstante gjatë këtyre kualifikueseve dhe për këtë arsye të përmbysësh me rezultat 6-0 është e pamundur”, tha trajneri i Kosovës, Franco Foda.

I pranishëm në konferencë ishte edhe mbrojtësi i Hoffenheim, Albian Hajdari, i cili analizoi duelin.

“Besoj se çdo lojë është e rëndësishme si të tjerat. Kemi ecuri të mirë, përveç Zvicrës që na mundi, megjithatë kemi fituar ose kemi marrë një pikë në sfidat e tjera. Ndaj Zvicrës hyjmë për fitore, për 3 pikë, sepse lojën e fundit shkruajtëm historinë, por synojmë të marrim maksimumin e pikëve”, tha Albian Hajdari.

Kosova renditet në vendin e dytë në grup me 10 pikë, 3 më pak se Zvicra kryesuese ndërsa përballja e parë mes tyre në këto kualifikuese përfundoi me fitoren 4-0 të helvetëve.