Kosova u ofron mbrojtje të përkohshme 68 afganëve

Ministri i Brendshëm i Kosovës, Xhelal Sveçla, ka bërë të ditur se të dielën Kosova u ka ofruar mbrojtje të përkohshme 68 afganëve.

Sveçla ka thënë përmes një postimi në Facebook, se akomodomi i tyre është vazhdimësi e angazhimit të Qeverisë së Kosovës ndaj krizës në Afganistan, për t’i mbrojtur individët në rrezik nga konfliktet e brendshme.

Në mbledhjen e Qeverisë, të mbajtur më 11 shtator, ishte miratuar vendimi për ofrim të mbrojtjes së përkohshme të 15 afganëve dhe familjarëve të tyre.

Kjo nuk është hera e parë që Kosova strehon afganë në territorin e vet.

Në verën e vitit 2021, kur talebanët janë rikthyer në pushtet në Afganistan, dhe janë tërhequr forcat ndërkombëtare, Kosova pati pranuar kërkesën e Shteteve të Bashkuara për pranim të përkohshëm të rreth 1.900 afganëve.

Ata ishte paraparë të qëndronin në Kosovë derisa do të kalonin procesin e verifikimit për t’u zhvendosur në SHBA, ose në ndonjë vend tjetër perëndimor.

SHBA-ja pati arritur marrëveshje të ngjashme edhe me disa vende tjera, përfshirë Shqipërinë.

LEXONI GJITHASHTU

• Kosova merr fitoren e dytë, serbët vijojnë provokimet në ndeshje
• VIDEO| Përplasje mes tifozëve shqiptarë dhe çekë pas thirrjeve “Kosova është Serbi”