Një polic ka humbur jetën në Kaçanik të Kosovës pasi ishte gjetur i plagosur rëndë në hyrje të ndërtesës së tij mbrëmjen e djeshme rreth orës 23:00.
Ai u transportua për në Qendrën e Mjekësisë në Kaçanik, por nuk arriti t’i mbijetonte plagëve, ka deklaruar zëdhënësi i Policisë për rajonin e Ferizajt, Kanun Veseli
Bëhet e ditur se ekipet kanë dalë në vendin e ngjarjes dhe se ende nuk dihen rrethanat e ngjarjes.
“Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën ‘Idriz Seferi’ në Kaçanik. Viktima është një pjesëtar i Policisë së Kosovës. Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik. Si pasojë e plagëve të marra pjesëtari i Policisë ka ndërruar jetë, kjo është konstatuar nga mjekët në këtë qendër. Për të gjitha veprimet policore është njoftuar prokurori i shtetit dhe IPK. Hetuesit dhe krimteknikët rajonalë kanë dalë në vendin e ngjarjes për t’i kryer ekzaminimet e nevojshme. Nuk dihen akoma shkaqet se si ka ardhur deri te kjo ngjarje”, ka thënë Veseli.
LEXONI GJITHASHTU:
- Aksident tragjik në autostradën Milot-Morinë, humbin jetën dy persona
- Trump vendos detyrime doganore hakmarrëse kundër të gjitha vendeve