Kreu i BDI vlerëson procesin zgjedhor: Ditë feste e demokracisë

Kryetari i Bashkimit Demokratik për Integrim, Ali Ahmeti ka votuar në vendlindjen e tij në fshatin Zajas të Kërçovës. Pas votimit, Ahmeti vlerësoi ecurinë e procesit zgjedhor duke theksuar se është “ditë feste e demokracisë”.

“Kjo është kulturë, është festë familjare dhe shtetërore ku demonstrohen vlera të mirëfillta demokratike. Jemi shtet në prag të fillimit të negocimit me BE-në dhe ky proces zgjedhor sigurisht që ndihmon në vlerat që ndërtojmë si shtet”, tha Ahmeti.

Kreu i BDI shtoi se uronte që në përfundimit të procesit zgjedhor, palët të pranojnë rezultatit dhe bëri thirrje për më shumë dialog dhe kompromis për integrimin e vendit në BE.

“Të kemi më shumë kontribuues dhe dialog e kompromis mes palëve sepse është në pyetje një proces i rëndësishëm, kështu që unë do jem njëri nga kontribuuesit që do të apeloj të arrihet sepse kjo e arritur është në dobi të të gjithëve”, ka shtuar kreu i BDI.

Në raundin e dytë të zgjedhjeve lokale në Maqedoninë e Veriut votohet në 44 komuna, ku BDI garon në 14 prej tyre.