“Krimeja, e panegociueshme”- Lavrov kundër SHBA: Nuk e dorëzojmë Zaporizhzhian

Ministri i Jashtëm i Rusisë, Sergey Lavrov, ka deklaruar se Rusia nuk do të pranojë asnjë ndryshim në menaxhimin e centralit bërthamor të Zaporizhzhias dhe ka këmbëngulur se pushtimi i Krimesë nga Moska është një “marrëveshje e përfunduar”.

Në një intervistë për CBS News më 26 prill, Lavrov theksoi se centrali bërthamor i Zaporizhzhias mbetet nën kontrollin e korporatës shtetërore ruse Rosatom dhe se çdo sugjerim për ndryshim të menaxhimit është i papranueshëm.

“Nuk kemi marrë kurrë një ofertë të tillë dhe nëse e marrim, do të shpjegojmë se termocentrali drejtohet nga Rosatom. Siguria është plotësisht e garantuar, pavarësisht përpjekjeve të rregullta të Ukrainës për të provokuar një fatkeqësi bërthamore në Evropë dhe Ukrainë,” tha Lavrov, duke shtuar se uzina është nën monitorim të vazhdueshëm nga Agjencia Ndërkombëtare e Energjisë Atomike.

Komentet e tij vijnë mes raportimeve se Shtetet e Bashkuara kanë propozuar një plan për rikthimin e kontrollit të uzinës nën autoritetin ukrainas, me synimin që më pas të menaxhohej në mënyrë ndërkombëtare për të furnizuar me energji zonat e prekura nga lufta.

Por Lavrov ishte kategorik për këtë propozim amerikan: “Jo, nuk mendoj se mund të imagjinohet ndonjë ndryshim.”

Paralelisht me çështjen e Zaporizhzhias, Lavrov theksoi se çështja e Krimesë është e mbyllur. “Rusia nuk negocion territorin e saj,” deklaroi ai, duke iu përgjigjur pyetjeve mbi mundësinë e përfshirjes së statusit të gadishullit në bisedimet e paqes.

Ai theksoi se pushtimi i Krimesë është një “marrëveshje e përfunduar”, duke përjashtuar kategorikisht çdo rikthim të saj nën kontrollin e Ukrainës.

Plani i paqes me shtatë pika i raportuar nga Uashingtoni thuhet se parashikon njohjen e sovranitetit rus mbi Krimenë nga ana e SHBA-së.

Megjithatë, Presidenti Zelensky ka përjashtuar vazhdimisht dorëzimin e çdo territori ukrainas, duke e konsideruar këtë veprim në kundërshtim me Kushtetutën e vendit.

Në intervistën për CBS News, Lavrov mbrojti gjithashtu sulmet e fundit ajrore ruse në Kiev, duke pretenduar se ato synonin vetëm objektiva ushtarake. “Ne do të vazhdojmë të godasim instalacionet ushtarake të Ukrainës, mercenarët e huaj dhe instruktorët evropianë,” tha ai.

LEXONI GJITHASHTU:

• Trump: Mendoj se Zelensky është i gatshëm t’ia dorëzojë Krimenë Rusisë
• Lavrov dhe Rubio folën zhvillojnë bisedë telefonike, çfarë u diskutua