“Krimi në Shqipëri nuk njeh moshë, as gjini”, sociologu: Institucionet të ndërhyjnë

Sociologu Gëzim Tushi tha në një intervistë për “Good Morning Albanians” se krimi  në shoqërinë shqiptare është rritur aq shumë sa tani nuk njeh më kufij, ai është përtej moshës dhe përtej gjinisë.

Duke marrë shkas nga ngjarja e rëndë e ndodhur një ditë më parë në zonën e Freskut në Tiranë, ku për motive pronësie vëllai vrau vëllanë e më pas veten, sociologu tha se në raste të tilla ku brenda familjes mungon kohezioni për t’i zgjidhur këto çështje është e domosdoshme ndërhyrja e institucioneve përkatëse.

“Krimi në shoqërinë shqiptare është zgjedhur është demokratizuar, është përtej moshës, përtej gjinisë. Ne kemi krime në fshat, në qytet, kemi krime që i bëjnë të rinjtë, krime që i bëjnë të moshuarit, ky është njeriu.

Çështja është se çfarë mund të bëjmë për të parandaluar këto ngjarje. Kur bëhet fjalë për pronat unë them se për veç përgjegjësisë brenda për brenda familjes, që mungon kohezioni për t’i zgjidhur në mënyrë paqësore konfliktet. Duhet që institucionet përkatëse t’i japin zgjidhje problemeve të pronësisë”,-tha sociologu.