Rama: I hapur për ndryshimin e Kushtetutës për zgjedhjen e Presidentit

Kryeministri, Edi Rama është shprehur i hapur për ndryshimin e Kushtetutës në mënyrë që Presidenti të zgjidhjet me votim të drejtpërdrejtë nga qytetarët.

Në mbledhjen e grupit parlamentar të PS, të martën, Rama theksoi se për të shkuar në këtë pikë, duhet që Presidenti i zgjedhur nga populli të ketë disa “kompetenca” pasi aktualisht “Shqipëria është një republikë e pastër parlamentare”.

“Shqipëria mund të zgjedhë një president nga populli nëse do të ndryshojë ngrehinën e vet Kushtetuese dhe do t’i japë presidentit disa instrumente që të ketë peshën dhe zërin e vete bazuar në atributet që i jep Kushtetuta”, tha kreu i PS.

Kryeministri shtoi se kjo çështje mund të vendoset me referendum dhe pritet të jetë një nga pyetjet që do t’i drejtohen qytetarëve në Këshillimin e ardhshëm Kombëtar.

Për zgjedhjen e presidentit të ri që do të zëvendësojë Ilir Metën, Rama tha se do të ketë konsultime për emrat por ato nuk do të bëhen publike.

Në mbledhjen e sotme të grupit të PS, deputetët socialistë do të propozojnë tre emra për kreun e ri të shtetit.

Nga 19 prill deri më 29 prill, PS do të zhvillojë konsultime me deputetët e saj, opozitën dhe shoqërinë civile për zgjedhjen e Presidenti konsensual.

PS ka kërkuar që më 4 maj të mbahet seanca e parë në Kuvend për votimin e Presidentit të ri. Në tre raundet e para kërkohen 84 vota, ndërsa në raundin e katërt dhe të pestë mjafton shumicë e thjesht.

LEXONI GJITHASHTU:

Rama takon ish-kryeministrin britanik, Toni Bler