Kryenin gjueti të paligjshme, arrestohen pesë persona në Shkodër

Policia e Shkodrës ka arrestuar 5 shtetas, pasi u kapën në flagrancë gjatë natës së djeshme, në fshatin Rragam, duke kryer gjueti të paligjshme.

Në kuadër të operacionit të koduar “Hunters”, janë arrestuar shtetasit E. F., 30 vjeç, E. M., 36 vjeç, K. D., 36 vjeç, V. N., 29 vjeç dhe S. S., 23 vjeç, të gjithë banues në Shkodër.

Sipas raportimeve, policia ka bërë të ditur se: “Gjatë kontrolleve, në fshatin Rragam, shërbimet e Policisë kanë konstatuar 5 shtetas që kryenin gjueti të paligjshme. Gjatë kontrollit në automjetin me të cilin qarkullonin këta shtetas, u gjetën: 1 armë zjarri pistoletë, 1 armë zjarri pushkë, 1 armë gjahu teke, 1 armë gjahu shotgan, municion luftarak, 1 dron dhe 1 shpend i vrarë, të cilat u sekuestruan në cilësinë e provës materiale”.

Ndërkohë, gjatë kontrollit në banesën e shtetasit E. M., u gjetën një sasi lënde të dyshuar narkotike Cannabis Satiava, e cila u sekuestrua gjithashtu në cilësinë e provës materiale.

Materialet procedurale iu referuan Prokurorisë së Shkodrës, për veprime të mëtejshme, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe mbajtja pa leje e amëve të gjuetisë dhe sportive”, “Dëmtimi i specieve të mbrojtura të florës dhe faunës së eger” dhe “Prodhimi dhe shitja e narkotikëve”.

LEXONI GJITHASHTU:

• Baste në plazhin e Durrësit/ Në pranga pronari i lokalit, procedohen bastvënësit
• U ekstradua nga Spanja, GJKK konfirmon masën e arrestit me burg për Juxhin Kokën