Kryqi i Kuq trajnon të rinjtë për dhënien e ndihmës së parë pas një aksidenti

Rritja e aksidenteve rrugore ka sjellë reagimin e disa organizatave, të cilat synojnë parandalimin e këtyre ngjarjeve përmes sensibilizimit, apo dhënien e ndihmës së parë për të lënduarit.

Kryqi i Kuq në Gjirokastër po trajnon një grup të rinjsh vullnetarë për dhënien e ndihmës së parë në raste aksidentesh. Të rinjtë do të asistojnë në kohë nga ana mjekësore personat e lënduar si shkak i aksidenteve.

“Jemi të vetëdijshëm që numri i aksidenteve është i lartë dhe sa më shumë njerëz të jenë të trajnuar për të dhënë ndihmën e parë në raste aksidentesh aq më mirë është dhe aq mw pak jetë të humbura do të kemi. Prandaj ne investojmë çdo vit tek të rinjtë që të japin këto mësime të ndihmës së parë bazë”, thotë Kristian Kura, koordinator i Kryqit të Kuq.

“Duke parë kohët e fundit që është rritur shumë numri i aksidenteve mendoj se përfshirja e të rinjve për të dhënë ndihmën e parë është shumë e nevojshme dhe e domosdoshme. Janë ata të cilët do të japin ndihmën e parë në momentin që ndodh aksidenti”, shprehet Refie Stroka, trajnuese Kryqi i Kuq.

Rritja e numrit të aksidenteve me pasoja të rënda e bën të domosdoshëm sensibilizimin për parandalimin e tyre dhe respektimin e Kodit Rrugor.

LEXONI GJITHASHTU:

• Aksidentoi për vdekje punonjësin e policisë dhe u largua, arrestohet 27-vjeçari
• Ndryshimet në Kodin Rrugor. Gonxhja: Rastësi, s’kanë lidhje me aksidentin tragjik