Kthim i shërbimit të detyrueshëm ushtarak në Shqipëri? Përgjigjet ministri Vengu

Ministri i Mbrojtjes, Piro Vengu, ishte këtë të dielë në Euronews Albanian i ftuar në emisionin Weekend me Alba Xhanin, i cili foli mbi kthimin e detyrueshëm të shërbimit ushtarak.

Ministri Vengu theksoi se juridikisht shërbimi ushtarak në Shqipëri është thjesht i pezulluar me një vendim të Këshillit të Ministrave para disa dekadash.

“Juridikisht, është ende diçka e mundur dhe e realizueshme në vendin tonë. Ne kemi menduar të ndjekim një strategji tjetër, ringritjen e forcës aktive dhe rritjen e numrit të ushtarakëve aktivë me 30% të personelit shtesë. Vendimmarrjet që lidhen me rikthimin e shërbimit të detyrueshëm janë vendimmarrje që merren edhe në sensin e një sigurie kolektive se nuk jemi të përjashtuara nga obligimet e NATO-s dhe kërcënimet që kemi, por për momentin nuk kemi marrë një vendim të tillë.

Nga ana tjetër, nuk është se nuk po bëjmë elementët e tjerë, si ringritja e komponentëve aktivë, shumimi i forcës dhe e forcës rezerviste, e cila është një mënyrë për të pasur kapacitete të plota në të ardhmen”, tha Vengu.

E pyetur nga gazetarja nëse fushatat rekrutuese janë një lloj testi për popullatën dhe për të parë reagimet e tyre, ministri u shpreh:

“Fushatat e rekrutimit nga Forcat e Armatosura shërbejnë si një barometër për kapitalin njerëzor kombëtar. Në çdo fushatë rekrutimi kemi trefish kërkesa nga sa mund të akomodojmë, që tregon interes të madh. Gjatë këtyre fushatave bëjmë testime gjuhësore, testim akademik, vlerësim të pjekurisë morale dhe të personalitetit të kandidatëve. Kjo na jep një pamje të kapaciteteve njerëzore në rang vendi. Është një instrument shumë i rëndësishëm statistikisht për gadishmërinë dhe përgatitjen e të rinjve shqiptarë.

Qëllimi me akademinë nuk është vetëm kurikula ushtarake. Ne po ofrojmë programe të dyfishta, qoftë brenda vendit, qoftë jashtë vendit. Po ashtu, kemi hapur një master të ri me Universitetin e Vlorës për specializimin e inxhinierëve në industrinë ushtarake”, tha ministri.

LEXONI GJITHASHTU:

• Zbardhet vrasja e Pavlin Prekës në derë të shtëpisë në Shkodër,arrestohen dy autorët
• Imuniteti i Ballukut, Rama flet për lëvizjen e mazhorancës në Këshillin e Mandateve