Kuqezinjtë në Poloni, Shqipëria dhe Sylvinho luajnë ndeshjen e parë për Euro 2024

Kombëtarja shqiptare mbërrin sot në Poloni, një ditë përpara ndeshjes që do të luajë me ekipin e këtij vendi.

Me interes po pritet formacioni i parë i trajnerit Sylvinhos, por edhe reagimi i grupit të Robert Levandovskit.

Kuqezinjtë ndodhen që të dielën në Poloni për t’u përgatitur për ndeshjen e parë të kualifikueseve për kampionatin europian. Trajneri Sylvinho do të ketë në dispozicion grupin e plotë pasi portieri Thomas Strakosha dhe sulmuesi Myrto Uzuni janë stërvitur rregullisht me grupin, duke lënë pas shqetësimet nga lodhja muskulore.

Në Varshavë, Shqipëria do të gjejë një Poloni të vendosur për të marrë fitoren e parë në këto eliminatore, pas humbjes që pësuan ndaj Çekisë në transfertë.

Vetë kapiteni i polakëve, Robert Levandovski ka kërkuar që fokusi të zhvendoset në ndeshjen kundër kuqezinjve, si e vetmja mënyrë që ekipi të hyjë në rrugën e duhur duke marrë një fitore.

Ndërkohë tek kombëtarja shqiptare me interes pritet formacioni me të cilin do të zbresë në fushë Sylvinho.

Ndryshe nga ekipet e tjera në grupin E, të hënën për Shqipërinë do të jetë ndeshja e parë për Euro 2024. Grupi udhëhiqet nga Çekia me tre pikë, e ndjekur nga Ishujt Faroe dhe Moldavia me nga 1 pikë. Në vend të fundit janë polakët, të cilët humbën 3-1 ndeshjen me çekët.