Kurti përkutjon 30 shqiptarët e vrarë: Kosova s’do i harrojë kurrë të rënët për liri

Kryeministri i Kosovës Albin Kurti ka përkujtuar 30 ushtarë të UÇK-së dhe civilë shqiptarë të vrarë nga Serbia, 25 vite më parë në Rogovë të Hasit, Goden e Bishtazhin të Gjakovës.

Përmes një postimi në Facebook, Kurti shkruan se plagët e krimeve nuk vjetërohen dhe Kosova nuk mund t’i harrojë të rënët për liri.

“Përvjetorët na i përtërijnë plagët e luftës. Plagët e krimeve që nuk vjetrohen.

Republika e Kosovës nuk i harron e as nuk i falë krimet e kryera nga Serbia.

Më 27, 28 dhe 29 janar të vitit 1999, forcat e armatosura serbe i vranë 30 shqiptarë në Rogovë të Hasit, Goden e Bishtazhin të Gjakovës. Në këtë 25 vjetor i përkujtojmë luftëtarët dhe civilët e rënë për liri, që me sakrificën e tyre e shtruan rrugën deri te ҫlirimi i Kosovës nga Serbia okupatore. Atë botë ranë duke luftuar 21 ushtarë të Ushtrisë Çlirimtare të Kosovës dhe nëntë civilë shqiptarë.

Të monumentalizuar në historinë e re të Kosovës, një çerek shekulli më pas i kujtojmë me emrat e tyre të rënët në ato ditë janari: Agim Zeneli, Agron Rama, Agush Gjocaj, Bahtjar Morina, Daut Kelmendi, Emrush Çetaj, Gëzim Ademaj, Gaspër Karaqi, Hamdi Berisha, Haxhi Kleçka, Ilir Merturi, Kasim Shala, Luan Smajli, Memë Lleshi, Naim Dreshaj, Naim Gashi, Prend Lleshi, Sahit Krasniqi, Sejdi Rama, Valon Gashi, Vesel Avdyli, Rrustem Morina, Selman Morina, Muhamet Morina, Nusret Morina, Xhevdet Berisha, Ibrahim Kryeziu, Adem Shala, Zyber Shala dhe Rifat Shala.

Lavdi dëshmorëve dhe martirëve! I përjetshëm qoftë kujtimi për ta!”, shkruan Kurti.

LEXONI GJITHASHTU:

• “E takove Kurtin, ç’porosi të dha?”- Vajza e Sanduloviç: Si më ndaluan agjentët serb
• Kurti uron kryeministrin Xhaferi: Maqedoni e Veriut euroatlantike, është ajo që duam