Kurti: Serbia rrëmbeu qytetarin tonë se ishte kundra Vuçiç

Kryeministri në detyrë i Kosovës, Albin Kurti, ka thënë se qytetari i rrëmbyer nga ana e xhandarmerisë serbe brenda territorit të Kosovës, i cili përveç se i sulmuar, ka qenë edhe i plagosur, u rrëmbye nga shteti i Serbisë vetëm pse ka qenë kundërshtar i politikave dhe i regjimit të presidentit të Serbisë, Aleksandar Vuçiç.

“Sulmi, me çfarë dimë deri tani, ka ndodhur në territorin e Republikës së Kosovës, qytetari i sulmuar e i plagosur i rrezikuar për jetë është shtetas i Republikës së Kosovës, gjithçka tregon që e kanë sulmuar sepse është kundërshtar i politikave dhe i regjimit të presidentit të Serbisë, Aleksandar Vuçiç”, tha ai në një konferencë për media.

Policia, sipas Kurtit, ndodhet në vendin e ngjarjes që prej atëherë në asistencë edhe me KFOR-in edhe EULEX-in dhe po kryhen procedurat hetimore.

“Është e qartë se fqinjë ynë verior po vazhdon me sulmet e veta të cilat kanë për qëllim disiplinimin e serbëve dhe në anën tjetër destabilizimin e Kosovës”, shtoi ai.

Autoritetet e Kosovës e kanë akuzuar të hënën Serbinë për cenim të integritetit territorial të Kosovës, pasi Policia e Kosovës ka bërë të ditur se më 1 nëntor ka pranuar informacion se në zonën e Leposaviqit, një shtetas i Kosovës, i nacionalitetit serb, me inicialet M.V., dyshohet se është plagosur dhe është rrëmbyer nga xhandarmëria serbe.

Në anën tjetër, autoritetet në Serbi nuk janë deklaruar rreth këtij rasti.

Sipas njoftimit të Policisë, vendi i ngjarjes ku raportohet se ka ndodhur rasti dyshohet se gjendet brenda territorit të Republikës së Kosovës, pra brenda hapësirës [siç quhet pika zero -0-], në afërsi të zonës së Leposaviqit, qytet në veri të vendit, i banuar me shumicë serbe.

Sipas këtij institucioni, Policia e Kosovës ka bashkëpunuar me misionin e NATO-s në Kosovë [KFOR] si përgjegjës për zonën/brezin kufitar.

LEXONI GJITHASHTU:

• Integrim në BE para normalizimit të raporteve Kosovë-Serbi, Vuçiç: Jemi të hapur
• Kuvendi i Serbisë kalon me procedurë të përshpejtuar projektin e Jared Kushener