Kurti-Vuçiç bashkë më 14 shtator, Borrell konfirmon takimin mes dy liderëve

Takimi i radhës i kryeministrit të Kosovës, Albin Kurtit, dhe presidentit të Serbisë, Aleksandër Vuçiç, do të zhvillohet me 14 shtator.

Lajmi u konfirmua nga Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell. Kurti dhe Vuçiç janë takuar për herë të fundit më 2 maj, nëntë ditë pas zgjedhjeve të jashtëzakonshme në veri të Kosovës, të cilat janë bojkotuar nga popullata lokale serbe.

Nga ajo kohë, mes dy vendeve ka pasur një sërë tensionesh dhe krizash. Më 30 gusht, BE-ja përsëriti thirrjen për të dy vendet që të krijojnë një klimë për vazhdimin e dialogut. Dy vendet, nën ndërmjetësimin e Bashkimit Evropian, janë në bisedime për normalizimin e marrëdhënieve qe nga viti 2011.

Ndonëse kanë arritur dhjetëra marrëveshje në fusha të ndryshme, zbatimi i shumicës prej tyre ka ngecur.  Në një konferencë për media në Spanjë, Borrelli ka njoftuar se bashkë me Presidencën Spanjolle të BE-së synojnë një takim të ministrave të shteteve anëtare të BE-së me ministrat e Jashtëm të Ballkanit Perëndimor për ta analizuar situatën në rajon.

LEXONI GJITHASHTU:

• Kërcënoi në emision se do vriste Kurtin, arrestohet nga policia e Kosovës rapsodi
• Deklarata kërcënuese ndaj Kurtit, Prokuroria merr në pyetje kreun e OVL-UÇK