Analisti serb, Dushan Janiç thotë se nuk ka një përpjekje të vërtetë për të eleminuar fizikisht Presidentin e Serbisë, Aleksandër Vuçiç.

Në një intervistë për Euronews Albania, Janiç u shpreh se kërcënimet ndaj Vuçiçit i sheh si një mesazh ndaj partive të koalicionit qeveritar.

“Ka pasur disa informacione më parë, por tani nuk është shumë oportuniste të shohim materialet televizive që treguan arrestimin e një personi. Personalisht nuk jam i habitur nga kjo. Por nuk besoj se është një përpjekje e vërtetë për të eleminuar presidentin Vuçiç, por më tepër një mesazh ndaj partive të koalicionit.

Mund të them se institucionet tona, shërbimi sekret, kanë qenë shumë tolerante ndaj organizatave ekstemiste, që nga periudha e ish-kryeministrit Koshtunica dhe presidentit Tadiç. Këto organizata janë toleruar dhe politika i ka mbështetur ato. Është sërish politika që i nxit të lëvizin kundër Vuçiçit”, theksoi ai.

Të ashtuquajturit patriotë zhvilluan në Serbi një protestë para parlamentit mbrëmjen e djeshme dhe kërcënuan hapur se do të vrisnin presidentin Vuçic dhe të gjithë bashkëpunëtorët e tij.

Ekstremistët e djathtë serbë protestuan kundër autoriteteve në vend dhe dialogut me Kosovën, që zhvillohet nën ndërmjetësimin e Bashkimit Evropian.

Në këtë protestë, të organizuar nga organizata e ekstremit të djathtë, “Patrulla e Popullit”, u panë edhe simbolet e grupit mercenar rus, Wagner.

LEXONI GJITHASHTU

• Protestë në Serbi për Kosovën, ekstremistët kërcënojnë Vuçiçin: Do të të vrasim!
• ‘Nuk do lejojmë dhunë’, Vuçiç reagon pas incidentit me ekstremistët e djathtë serbë
• Ekstremistët e djathtë serbë protestojnë me simbole të Wagner kundër dialogut