Kushtet e punës, të mërkurën mësuesit vendosin nëse do të futen në grevë

Të mërkurën do të mblidhet Këshilli Kombëtar i Arsimit, ku mësuesit do të vendosin nëse do të nisin grevë apo do të kërkojnë një takim me përfaqësues të Ministrisë së Arsimit për mungesën e regjistrave në shkolla.

Mësuesit janë të pakënaqur edhe për kushtet e punës, si mungesa e transportit, mos-pagesa e orëve shtesë, si dhe mungesa e mësuesve në shkolla për shkak të covid.

Arsimtarët paralajmëruan grevë më datën 19 janar, por kjo u shty për një afat të pacaktuar nga Sindikata  e Pavarur e Arsimtarëve Shqiptarë.

Ndryshe nga viti i kaluar, sivjet nuk është vënë në dispozicion një fond i veçantë për mësimdhënien gjatë pandemisë.

Për këtë çështje, eksperti i Arsimit, Ndriçim Mehmeti deklaroi për emisionin “Mirëmëngjes” në Euronews Albania se mësuesit nuk ka motivim në punën e tyre për shkak të pagave të ulëta.

“Duhet të zgjatet viti shkollor, të krijohen shkollat verore. Për pagat, Kosova, Mali i Zi dhe Serbia, i kanë më të larta se ne. Mësuesi duhet të çohet për dinjitetin e vet. Qeveria nuk ka bërë asgjë pas pandemisë”, deklaroi ai.

Të njëjtin medim ka edhe  ish-zv.ministrja e Arsimit, Nora Malaj, e cila shtoi se në zonat rurale ka probleme për realizimin e mësimit me standard.

Sakaq, ajo nënvizoi se Ministria e Arsimit duhet të fokusohet tek kurrikulat mësimore dhe metodologjia që po përdoret në shkolla.

“Nxënësit nuk duhet të mbingarkohen me detyra nga ana e nxënësve. Duhet të ngrihet një strukturë nga ministra për të parë kurrikulat dhe metodologjinë që përdoret”, tha znj. Malaj.