Ministria e Transportit në Korenë e Jugut ka njoftuar se regjistruesit e të dhënave të fluturimit dhe të zërit të kabinës në avionin Jeju Air, i cili u rrëzua në Dhjetor 2024, kanë ndaluar regjistrimin rreth katër minuta para se avioni të godiste një strukturë betoni në aeroportin Muan, duke shkaktuar vdekjen e 179 pasagjerëve. Ky incident është përshkruar si katastrofa më e rëndë ajrore në Korenë e Jugut në vitet e fundit.
Sipas autoriteteve që po hetojnë rrëzimin e avionit, po punohet mbi shkaqet që kanë çuar në ndërprerjen e regjistrimit të kutive të zeza, të cilat nuk kanë regjistruar momentin e rrëzimit të avionit.
Të dhënat fillestare nga regjistruesi i zërit u analizuan në Korenë e Jugut, ndërsa kur u vërtetua se mungonin disa të dhëna kyçe, ato u dërguan për analizë në laboratorin e Bordit Kombëtar të Sigurisë së Transportit të SHBA-së.
Fluturimi 7C2216 i Jeju Air, i cili u nis nga Bangkoku në Tajlandë, për në Muan, Korenë Jugperëndimore, pësoi një aksident tragjik. Avioni u ul me bark dhe shpërtheu në flakë pas goditjes së një argjinature në fund të pistës. Pilotët raportuan se avioni kishte pësuar një goditje nga shpendët dhe shpallën gjendjen e emergjencës vetëm katër minuta përpara se të ndodhte rrëzimi. Dy anëtarë të ekuipazhit që ndodheshin në pjesën e bishtit të avionit, megjithëse të plagosur, u shpëtuan.
Sim Jai-dong, një ish-hetues aksidentesh në ministrinë e transportit, theksoi se mungesa e të dhënave në minutat kyçe ka shtuar misterin rreth aksidentit.
Hetimi gjithashtu po shqyrton strukturën e argjinaturës dhe pse ajo ishte ndërtuar me material të ngurtë dhe shumë pranë fundit të pistës.
LEXONI GJITHASHTU:
- Një goditje zogjsh mund të ketë shkaktuar problemet në avionin e Koresë së Jugut
- Koreja e Jugut urdhëron inspektim të linjave ajrore pas aksidentit të rëndë
