Largimi i Prodës, dalin emrat për kandidat për Drejtorin e Përgjithshëm të Policisë së Shtetit

Gazetari i Euronews Albania, Eni Ferhati, në një lidhje për edicionin informativ ka dhënë detaje dhe emrat lidhur me garën për drejtor të përgjithshëm të Policisë së Shtetit pas dorëheqjes së ish-drejtorit Ilir Proda disa ditë më parë. Ferhati ka thënë se nga data e sotme emrat e kandidatëve do t’i nënshtrohen kritereve në Komisionin Përzgjedhës për marrjen e këtij posti.

“Jemi vetëm 45 minuta nga skadimi i afatit zyrtar për garën e hapur për drejtuesin e ri të Policisë së Shtetit pas dorëheqjes së Ilir Prodës. Sipas informacioneve paraprake, Ministria e Brendshme do t’i bëjë publikë emrat zyrtarë. Kemi arritur të mësojmë disa emra që synojnë postin, është Tonin Vocaj, Elidon Çela, drejtor i Policisë së Vlorës, drejtori për Departamentin Ndërkombëtar në Policinë e Shtetit, Pëllumb Seferi, drejtori aktual i Policisë së Fierit, Skënder Hitaj, Lorenc Panganitën, Alfred Çepen, Gentjan Shehajn, ndërkohë që sipas informacioneve ka edhe kandidatë që vijnë nga jashtë Policisë së Shtetit.” – tha Ferhati midis të tjerash.