Largohet nga detyra mësuesi i dënuar për pedofili, pas denoncimit nga nxënësit

Ministria e Arsimit ka larguar nga detyra një mësues në shkollën 9-vjeçare “22 Tetori” në Berat pasi rezultoi se ishte i dënuar për ngacmim seksual.

Ministrja, Evis Kushi përmes një reagimi në Facebook, shprehet se përveç largimit nga puna ka nisur një hetim administrativ për personat përgjegjës.

Znj. Kushi nuk i referohet Drejtorisë Rajonal të Arsimit që ka bërë punësimin, por thotë se “është e pafalshme që persona të tillë të hyjnë qoftë edhe për një orë të vetme në mjediset e shkollave tona” dhe ka paralajmëruar masa ndëshkuese.

“Dënoj fort rastin e punësimit me kontratë të një mësuesi në Berat, që në vitin 2003 është dënuar nga gjykata për pedofili. Pavarësisht se gjykata nuk ia hoqi të drejtën e rikthimit në detyrë dhe të ushtrimit të profesionit, edhe pse prokuroria e kërkoi një gjë tillë”, shprehet ministrja.

Reagimi erdhi pas denoncimit që kanë bërë vetë nxënësit e shkollës 9-vjeçare të cilët kanë shprehur frikë. Mësuesi i matematikës, Engjëll Bregu, 62 vjeç është dënuar nga Gjykata e Beratit me 7 muaj burg për pedofili dhe ngacmim seksual.

Ministrja e arsimit pas këtij rasti thotë se do të do të rishikohet baza ligjore “për të forcuar rregullat dhe procedurat e punësimit apo shkarkimit të mësuesve, për të mos lejuar që të ndodhin më raste që mund të përbëjnë rrezik për fëmijët”.

“Ju lutem të gjithëve, prindër, nxënës, mësues, apo përfaqësues të komuniteteve, denonconi çdo rast që cenon, apo dyshoni se rrezikon, të drejtat dhe sigurinë e fëmijëve në shkollë apo jashtë saj”, përfundon reagimi i znj. Kushi.