Lavrov: Evropa u tërhoq nga bisedimet e paqes për Ukrainën

Ministri i Jashtëm rus, Sergej Lavrov, deklaroi se Evropa ka zgjedhur të tërhiqet nga bisedimet e paqes për Ukrainën, pasi sipas tij, ka minuar disa marrëveshje të mëparshme të rëndësishme.

“Evropa dështoi të zbatojë marrëveshjen fillestare të arritur në shkurt 2014 dhe nuk reagoi kur opozita pushtoi ndërtesat qeveritare menjëherë pas nënshkrimit të dokumenteve. Ajo nuk zbatoi as Marrëveshjet e Minskut,” tha Lavrov.

Ai shtoi se situata u përsërit në prill 2022, kur “marrëveshjet e Stambollit u prishën me urdhër të kryeministrit të atëhershëm britanik Boris Johnson, ndërsa Evropa jo vetëm që nuk kundërshtoi, por e mirëpriti këtë veprim”.

Sipas Lavrov, aktualisht nuk ka “pothuajse asnjë diskutim” për një rol të mundshëm të vendeve evropiane në negociata.

Ndërkohë, zëdhënësi i Kremlinit Dmitry Peskov ka deklaruar më herët se Moska është në bisedime vetëm me Shtetet e Bashkuara për çështjen e Ukrainës.