Ledina Alolli përgjigjet pasi “u paracaktua” si fituese të primareve në Korçë

Nuk ka probleme në procesin e votimeve në primaret e Korçës dhe numri i votuesve është i kënaqshëm.

Ishte ky konstatimi i korrespondentit të Euronews Albania, Xhensil Shkëmbi i cili kishte në një intervistë Ledina Alollin e cila “u paracaktua” si fituese e primareve në Korçë.

Ajo tha se kjo garë ka pasur një proces i cili është zhvilluar mbi bazën e të gjitha udhëzimeve të PD-së dhe nuk mund të quhet “e paracaktuar”.

“Pjesëmarrës në të janë të gjithë demokratët, të gjithë simpatizantët. E veçanta e këtij procesi ishte që simpatizantët do të ishin pjesë e votimeve në këtë garë, çka do të thotë që ata janë regjistruar dhe sigurisht kanë marrë dhe miratimin e kryetarëve të grup seksioneve për t’u bërë pjesë e listave të simpatizantëve,” – u shpreh Alolli.

Ajo tha se është kontribuuese në PD që prej moshës 16-vjeçare, por fituesi i primareve do të vijë nga votat e demokratëve dhe në këto kushte nuk mund të ketë paracaktim.

Alolli iu përgjigj dhe kundërshtares së saj Entela Dvoranit e cila deklaroi se Alolli do fitonte zgjedhjet dhe se i kishte marrë studentët e saj për t’i kthyer në simpatizantë të PD-së.

“Asnjëherë nuk kam ngatërruar pjesën politike me pjesën profesionale, por unë do të doja shumë që ky proces në vetvete të kishte shumë të rinj votues,” – tha Ledina Alolli.

LEXONI GJITHASHTU:

• Spahia: Primaret të jashtëzakonshme, do jemi në krye të ndryshimit të madh
• Kreshnik Spahiu: S’e kuptoj pse çuditeni me primaret