Letra-bombë zyrtarëve spanjollë, rritet siguria rreth kryeministrit dhe ambasadave

Autoritetet në Spanjë kanë rritur masat e sigurisë pasi një numër letrash-bombë u janë dërguar së fundmi zyrtarëve të lartë, përfshirë kryeministrin Pedro Sanchez.

Të mërkurën një punonjës i ambasadës ukrainase në Madrid mbeti lehtësisht i plagosur kur një pajisje e tillë shpërtheu.

Ndërsa të enjten, policia spanjolle konfirmoi për mediat se një letër-bombë i ishte dërguar edhe ambasadës amerikane në Madrid.

Sipas zyrtarëve iberikë, mes personave të cilëve u janë adresuar letra të tilla është edhe ministri i Mbrojtjes.

Mendohet që ato të jenë të lidhura me mbështetjen që Spanja i ka ofruar Ukrainës, por deri tani askush nuk e ka marrë përsipër përgjegjësinë.

Letra dërguar në adresë të kryeministrit Sanchez, e cila mbante material pirroteknik u lokalizua më 24 nëntor dhe u çaktivizua para se dikush të lëndohej.

Qeveria spanjolle po i heton incidentet si akte terroriste. Një burim i afërt me hetimin ka deklaruar se pajisjet ishin dërguar në zarfe bojë kafe’ dhe përmbanin barut të lidhur me një mekanizëm aktivizimi.

LEXONI GJITHASHTU:

• Udhëtimi ‘epik’ i 3 emigrantëve drejt Spanjës, 11 ditë në timonin e anijes-cisternë
• Spanja merr vendimin, mbajtja e maskës në transportin publik me detyrim