Ligji për portet turistike, reagon për Euronews Albania delegacioni i BE në Tiranë

Delegacioni i Bashkimit Evropian në Shqipëri ka reaguar lidhur me ndryshimet e fundit të miratuara nga Parlamenti në Ligjin “Për portet turistike në Republikën e Shqipërisë”, në një përgjigje për gazetaren e Euronews Albania, Eksiola Shehu.

Në deklaratën zyrtare, Delegacioni i BE-së bën me dije se është në dijeni të zhvillimeve dhe se ndryshimet do t’i nënshtrohen një vlerësimi të detajuar nga shërbimet përkatëse të Bashkimit Evropian.

Sipas reagimit, vëmendje e veçantë do t’i kushtohet fushës së prokurimit publik dhe përputhshmërisë së këtyre ndryshimeve me legjislacionin e BE-së, i cili kërkon procedura transparente dhe konkurruese për dhënien e koncesioneve, përfshirë edhe në sektorin e porteve.

Delegacioni thekson gjithashtu se teksti i ri duket se përfshin disa dispozita të lidhura me Ligjin për Investitorët Strategjikë. Ky i fundit është një ligj që Shqipëria pritet ta shfuqizojë, në kuadër të angazhimeve të saj në Agjendën e Reformave dhe si pjesë e kushteve për mbylljen e Kapitullit 27 në procesin e integrimit evropian.

Në përfundim, Delegacioni i BE-së nënvizon se Shqipëria duhet të shmangë çdo hap që mund të jetë në kundërshtim me këto angazhime.