Lista Serbe, partia më e madhe e serbëve në Kosovë, ka kërkuar nga qytetarët në veri të lejohet lëvizja e KFOR-it dhe EULEX-it, duke thënë se prania e tyre është në përputhje me marrëveshjet ndërkombëtare të miratuara më parë.

Anëtarët e Listës Serbe u kanë bërë thirrje qytetarëve për paqe dhe vetëpërmbajtje, teksa Policia e Kosovës ka shtuar së fundi prezencën në veri, me qëllim të sigurimit të qytetarëve, shkruan REL.

“Të mos biem në provokime. Të gjithë kemi nevojë për paqen dhe vazhdimin e dialogut për t’u dhënë hapësirë negociatorëve të cilët do të arrinin zgjidhjen e kësaj situate me dialog dhe jo me lëvizje të njëanshme”, thuhet në njoftimin për media.

KFOR-i dhe EULEX-i janë duke e monitoruar situatën në veri të vendit, ku, më 10 dhjetor, janë ngritur barrikada dhe janë bllokuar disa rrugë nga serbët lokal, pas arrestimit të një ish-pjesëtari të Policisë së Kosovës, Dejan Pantiç.

Pantiç akuzohet se “ka organizuar sulmin terrorist” ndaj zyrave të Komisionit Qendror të Zgjedhjeve në veri të Kosovës më 6 dhjetor, kur “ishin sulmuar zyrtarët e KQZ-së dhe zyrtarët policorë”.

LEXONI GJITHASHTU

• ‘Shmangni përshkallëzimin’, Borrell reagon pas sulmit ndaj EULEX-it në veri
• Sulmohet patrulla e EULEX-it në veri të Kosovës
• Serbët u detyruan që t’i vendosnin barrikadat në veri, thotë Vuçiç