Logopedi rrëfen kolapsin e të dielës në urgjencën e fëmijëve

Të dielën në urgjencën e fëmijëve në Tiranë, tensionet ishin të dukshme.

Logopedi Erges Eskiu tregoi se rreth orës 23:15 kishte shkuar për të vizituar djalin dhe gjendja ishte alarmante. Në ambientet e urgjencës nuk kishte as shtretër as stativ, ndërkohë të miturit kishin dhimbje barku ose të vjella dhe as nuk kishin mundur të rehatoheshin.

Nga fluksi, Eskiu tha në “Goodmorning Albanians” se edhe personeli ishte i shqetësuar. Ata kërkonin mbështetje, por duke qenë se ishte gati mesnatë, nuk morën përgjigje.

Më herët përmes një postimi në Facebook Eskiu tregoi se ishte numri 56 në radhë, ndërkohë që brenda ndodhej numri 44 dhe i fundit në pritje ishte numri 77.

Sipas tij nuk ishte normale që në një ambient 40 metra katrorë, ndodhen 55 njerëz njëkohësisht në periudhë virozësh.