LSDM-BDI arrijnë parimisht marrëveshjen për qeverinë e re, mister fati i kryeministrit shqiptar

LSDM dhe BDI kanë arritur parimisht marrëveshjen për qeverinë e re në Maqedoninë e Veriut.

Përmes një deklarate të përbashkët shpërndarë për mediat thuhet se LSDM dhe BDI shpresojnë dhe presin se do të arrijnë marrëveshje për koalicion qeveritar gjatë ditëve të ardhshme, duke u shprehur të vetëdijshëm për urgjencën dhe nevojën për konsolidimin e institucioneve pas zgjedhjeve.

Pasi të dyja partitë vendosën parimet e koalicionit dhe përcaktimet e një qeverie të mundshme të përbashkët, ata po punojnë për harmonizimin e programeve dhe krijimin e një plani pune katërvjeçar të qeverisë së ardhshme, me fokus ekonominë, drejtësinë, barazinë dhe integrimin.

Një nga çështjet në diskutim është dhe ndarja e posteve qeverisëse. Ndërsa BDI e fokusoi fushatën elektorale te kryeministri shqiptar, ende nuk dihet se si do të jetë konfigurimi i ardhshëm i qeverisë.

A do të tërhiqet BDI nga pretendimi për kryeministër shqiptar, apo do të vihet në funksionon ideja e hedhur më herët për ndarje të mandatit të kryeministrit: dy vjet një shqiptar e dy vjet një kryeministër maqedonas.

Lideri i LSDM-së, Zoran Zaev mori të enjten mandatin për formimin e qeverisë dhe ka 20 ditë afat për krijimin e mazhorancës parlamentare. Nëse nuk arrin që ta bëjë këtë brenda afatit 20 ditësh, mandati do t’i kalojë liderit të VMRO/DPMNE-së, Hristijan Mickoski.

Lexoni gjithashtu:

RMV ende pa qeveri, takimi mes Zaev dhe Ahmetit përfundon pa rezultat

RMV, Ali Ahmeti thërret për dialog faktorin politik shqiptar në përvjetorin e marrëveshjes së Ohrit